【籃總盃】短評-睇永倫就好似睇馬刺


身為東方粉絲既小編,今日大戰當前,梗係收工即刻過去籃球勝地修頓睇波啦。
首先講下頭場先,第一二節滿貫真係壓住南華黎打,除左見到歐陽維江d轉身帶波fake 到對面仆低,仲有8號林俊光既表現真係令人眼前一亮,剷籃三分快攻樣樣有,以前睇過學界波都有留意過呢位球員,見到其實佢身體素質唔錯,彈跳力又好,但硬係有d打唔起。今日見到佢射入幾球三分個個run,連隔離觀眾都話,哇!佢依家fit 左咁多既!佢係甲一舞台真係唔同左,起碼信心都大左好多,呢個年輕球員真係值得大家留意一下!南華就唔使講啦,一個第三節夠打爆你,人人著火,當打完個run之後,以為佢換走d主力休息下,頂你見到阿懃同兆華準備換出黎,原來呢兩個主力成節都未出過,真係換極換到第十一十二人都可以打爆你,個種進攻既行雲流水,賞心悅目既組織,實在令人津津樂道,睇黎南華今年都係可以繼續屈機。
?
到尾場東方對永倫,身為東方Fans 既小編其實又唔想講太多,因為係現場用個心感受左加埋融入個氣氛,已經好足夠,靜係子禮上半場個四球三分,我諗依家修x d阿姐應該仲拖緊地。其實小編特別鍾意睇今年隊東方,唔知點解比起上年係有味道,上年除左雷聲大雨點小既中鋒班尼斯,阿Ga,李琪,兆榮,個個港隊,個個都知佢地勁,但個感覺又未勁到出面,始終都抗衡唔到南華永倫,其實有d失望。反而今年呢個全華陣,講真一開始睇,呢班真係二線,甚至三線料黎咋wor!但慢慢慢慢,你會見到子禮愈打愈有;見到鄧志恒由以前爛仔苦力淨係搶籃板,到依家自己帶波推上前場既侵略;見到胡卓彬以前成支火柴,波都渣唔穩,到依家我理你邊個鬼佬,俾個波我低位打爆你,一場入20幾分;仲有我上星期提過既昇昇;加埋今日俾人當沙包咁打都面不改容,都唔知有無內傷既徐遠成。呢班人真係無人係一線,縱使今日輸俾永倫,但籃總盃見到佢地每場打既都係好波,熱血波,生命籃球。仲要佢地既默契真係進步不少,見到好多大膽傳球,高笠,呢班後生仔真係打得好生,好大膽,好有我鍾意既味道。
?
至於永倫,只能夠講一句,真係薑係老既辣!有人話永倫係老人院,其實永倫就好似一隊馬刺,老又如何,就算我半場拎得20幾分,我一樣可以追得番。其實可能未必有咁多人留意到,永倫班球員,真係大部分都三張幾,甚至周迎堅已經四張,你見到今日既佢,雖然功架係度,但都已經不復當年勇。但另一邊37歲潘志豪又挺身而出,真係俾佢吹漲。縱使今日大家睇永倫絕地反擊,睇到好熱血既同時,小編一直都係度諗,永倫即使今日贏到,下場呢?下年呢?將來呢?見到馬刺既GDP可以慢慢退下火線,因為佢地搵到佢地將來-Leonard,反觀永倫,好似暫時未見到呢個人既存在,永倫既未來,對小編黎講,可能存在著一個問號。三五年後,周迎堅,劉子健,潘志豪呢班老將會慢慢退下來,阿Ga,肥煒,甚至泰那都變成老將時,到時既永遠,仲可以征戰到咩程度?會否好似今年飛鷹咁,成班唔打啦,拉班乙組小朋友上黎重建?黃金戰士又會面臨什麼命運?係諗呢堆問題之前,不如諗左佢地決賽贏唔贏到南華先!悶就悶左d,又係紅黃大戰,但愛波之人又點可以唔睇呢!利申:支持南華