【新生代球員大檢閱】-控球後衛篇


黃律堯(23歲)現效力甲一遊協。(上圖紫衫)
曾先後效力甲一晉龍,東方,南青。中學就讀文理書院,其後升讀香港理工大學,成為理大籃球隊既主力控球後衛。
黃律堯係2014年參與品牌主辦活動「打出名堂」獲選為最有價值球員之一,並分別去左上海同西班牙接受訓練,獲球星Lebron James 同Kobe Bryant親自指點。由打出名堂起籃球界亦開始關注佢既舉動。年輕充滿活力既黃律堯擅於組織攻勢,突破能力亦佳,瀟灑創意型既球風,令到佢經常係比賽做到出人意表既傳送。早前係職業球隊東方效力雖然出場時間唔多,但每次出到黎都有好表現,令人印象深刻,唯獨表現未夠穩定及未去到大將之風。現時係遊協坐穩正遠控衛既佢,只係23歲,黎緊既球季希望會再有突破,繼續打出名堂,帶領球隊更進一步。
???
鄭浩恒 Billy (24歲)現時效力甲一南華。(上圖紅衫)
係加拿大讀書既Billy,2015年開始獲賞識加入南華。其中經歷過傷患,然後由上年開始重新融入球隊,直到今年由南華新教頭李嘉耀開始點名重用,出場時間大增,係隊長羅意庭休息既時間,接管左南華控球組織既重要角色。2017年亦隨隊去厦門參加第三屆國際大學生籃球邀請賽,協助南華5連勝順利以全勝姿態拎到冠軍,兼拎埋最有價值球員。而係今年既籃總盃,表現亦非常突出,令人眼前一亮。Billy 既控球出色,帶波跑動非常之高速,係南華既Early game 同transition attack 體系當中扮演重要角色。除左快,Billy 亦都能傳能射。必要時佢既個人進攻能力亦唔可以睇小,左手將既佢有住先天既進攻優勢,再配合南華行雲流水既進攻體系,令佢係籃總盃總決賽勇奪19分,幫助球隊稱冠。係南華既訓練體系下,Billy 既將來絕對一片光明,慢慢成為隊長羅意庭既第二把交椅。希望將來加強體能同身體對抗既Billy,可以再下一成,成為一個更有侵略性既1號位球員。
???
林家滿(23歲)現時效力甲一標準福建。(上圖藍衫)
曾經效力甲一晉龍同旭輝。現時就讀香港城市大學既阿滿係城大籃球隊既主力控球後衛,帶領城大係各個唔同比賽拎到非常好既成績,亦曾經代表香港參加世界大學生運動會。阿滿係兩年前由晉龍既後備球員慢慢打出表現,再係上年加入升班馬旭輝,成為左球隊重心主力之一。今年去到傳統勁旅標準福建,係余耀明傷出後,相信上陣時間會更加多。佢曾經被籃球評述員稱為港版Stephen Curry,因為球風非常相似,雖然佢同Curry一樣,相比之下無勁爆既身體質素同埋體能,但佢優秀既外投能力,球場視野同觸覺,加上華麗既控球技術,令到佢係場上發揮到重大既作用。由佢學界年代都未必有人識既林家滿,慢慢上到黎甲一舞台站穩陣腳,被好多人視為非常有潛力既1號位,未來如果能夠繼續進步,再加強個人既進攻能力,佢既球風係控球後衛既角色上,絕對係可以成為球隊既靈魂指揮官。
???
楊睿騏 Ricky(19歲)現效力甲一東方龍獅。(上圖白衫)
年紀係四個入面最細,潛力亦係非常非常大。係學界年代,Ricky已經嶄露頭角,係Nike League 決賽入面絕殺對手拎到U16冠軍加MVP之後,俾拔萃男書院挖角成為球隊主力,再帶領球隊係學界精英賽決賽射入關鍵球擊敗英華書院奪冠。18歲既佢係職業隊東方升班甲一後首先上陣對遊協就拎到全隊最高既16分。Ricky中學畢業之後去左美國讀書,並係放假期間回流繼續接受東方既全職訓綀。係今年既籃總盃亦受到教綀重用,代表東方出戰,上陣時間亦非常多。Ricky 擁有出色既體能,防守能力同埋籃板能力,往往防守對方既主力,例如永倫既Tyler 時,表現亦非常稱職。佢係場上既成熟球風,侵略性同埋投入度,令人覺得佢完全唔似一個20歲都未夠時小朋友。一直以黎既亮麗表現,令到佢既評價都非常高,假以時日必定係香港籃壇未來既明日之星。希望將來會見到Ricky 可以代表東方出國打ABL,令佢見識更多更上一層樓。